「咩係Z級片？」
B片C片聽得多，咁Z片到底係乜傢伙？其實呢個term源自60年代，泛指製作成本比B片更低嘅電影，大多數由業餘嘅電影工作者在沒有大片商嘅支援下，獨立拍成。老實講句，製作成本咁鬼低，基本上無資源，咁你都估到完成品嘅質素係點狠樣了(當然也有反例，例如《活死人之夜》)。
不可不提的是Z級片大師艾活(Ed Wood)，無錯，即係添布頓幫他立傳、型男尊尼特普扮演過嘅嗰位人兄。佢嘅作品可以話創下Z級片嘅新高度，拍於1959年的《外太空非常九計劃》(Plan 9 From Outer Space)堪稱一絕，集齊「布景差、故事爛、演員零演技和不連戲」等各爛元素，被喻為人類史上最Q爛嘅電影，絕對係Z級電影嘅典範。
「Troma娛樂公司」
標榜著「創造未來新電影」嘅Troma Entertainment成立於1974年，專門拍攝題材惡俗、血肉橫飛、狗血淋頭同艷星露肉等下三流電影。係41年來，可謂始終如一，Troma製作和發行了一大堆非主流Z片，風格獨特，坐擁固定的粉絲群。
提起Troma，當然不能忽視它的靈魂人物—公司老闆兼首席導演Lloyd Kaufman。這位面容有點諧趣嘅老頭子，據說由於John Ford和溝口健二等大師嘅精神感召下，決定係耶魯大學畢業後投身電影業。後來Kaufman雄心壯志，與Michael Herz靠著300美元成立“Troma Entertainment”，但300雞做得啲乜呀？Kaufman硬著頭皮到《洛奇》、《週未狂熱》等拍攝片場當兼職，慢慢儲錢。在這段期間，他看罷片場制度嘅腐敗，明白到要搞獨立創作嘅重要性。但我猜不透自由創作跟拍Z級片有什麼關係～ Kaufman嘅經典力作有講述核子魔大鬧Punk校園嘅《Class of Nuke ’Em High》、《Troma War》同唔係《復仇者聯盟》嘅劇毒復仇者—《Toxic Avenger》，後者成為Troma Icon，故事講經常被人欺凌嘅毒男誤墮核子廢料，化身爛面大隻佬，穿著嬌俏嘅芭蕾舞裙拯救地球！
《銀河守護隊》導演占士根(James Gunn)過去係Troma嘅一份子，曾為Kaufman編寫羅密歐與茱麗葉—《Tromeo and Juliet》嘅劇本，據說食當年由迪卡比奧主演嘅《羅密歐與茱麗葉：後現代激情篇》條水，當然完全係惡趣味版本。佢老哥係《Make Your Own Dawn Movie》一書嘅引言曾誇口大讚：「Lloyd嘅風格混合了許多元素：鬧劇、血腥、性愛、雜耍、核子廢料等，受佢影響嘅人眾多，包括彼德積遜、Kevin Smith和塔倫天奴！」嗯，真係信不信由你。
老老豆豆，每部Troma出品一定會播段紅底大廈片頭，一望已傳來爛味，如果你跟我一樣鐘情惡趣味就睇啦～
Troma電影網上免費睇：
https://www.youtube.com/playlist…
撰文：方川明
04-10-2015
(原文刊於PeepingTom影訊網 : https://www.facebook.com/pt852)
電影宅·急便 